Pas një periudhe shumë të vështirë që po kalon e gjithë bota, tashmë aktivitetet sportive kanë nisur të rifillojnë. E njëjta situatë është edhe me motorsportin ku Formula 1 do të ndezë motorët për këtë sezon në datat 4-5 Korrik me Çmimin e Madh të Austrisë.
Për sa i përket motorsportit në Shqipëri, edhe këtë vit do të zhvillohet “Trofeu Skënderbej”, një garë në disiplinën Hill Climb e vlefshme për Kampionatin e Zonës së Europës Qendrore (CEZ-FIA). CEZ ka zyrtarizuar edhe kalendarin e ri për sezonin 2020 dhe gara që mbahet në Malin e Krujës është përcaktuar të zhvillohet në datat 29-30 Gusht 2020.
Automobile Club Albania që është organizatorja e kësaj gare, ka nisur menjëherë nga puna për të mundësuar një event spektakolar dhe shumë tërheqës. Në këtë garë marrin pjesë pilotë shqiptarë dhe të huaj, ndërsa emocionet dhe adrenalina që të fal ky kompeticion janë të garantuara.
Kujtojmë këtu se një vit më parë morën pjesë rreth 40 pilotë dhe u shpall fitues hungarezi Laszlo Szasz me kohën 2:12.009.
Në ditët në vazhdim do t’ju mbajmë të informuar në lidhje me gjithçka për këtë garë.
