Presidenti i FIA-s viziton Shqipërinë, përgëzime për zhvillimin e motorsportit dhe rritjen e sigurisë rrugore në takimin me Kryeministrin shqiptar

0
1082

Presidenti i FIA-s, Mohammed Ben Sulayem është takuar të hënën në Tiranë me Kryeministrin shqiptar, Edi Rama. Ben Sulayem u prit nga Presidenti i Klubit të Automobilit të Shqipërisë, Niko Leka.

Në emër të FIA-s, presidenti shprehu mbështetjen për projektin e Auto Moto Park, kompleksin e parë ndërkombëtar të garave të motorsportit që po ndërtohet në një vend të Ballkanit. Vendi në Elbasan ku po ndërtohet ky Auto Moto Park përfshin një cirkuit të Nivelit A për zhvillimin e aktiviteteve të motorsportit si edhe shërbime për sigurinë rrugore.

FIA do të mbikëqyrë homologimin e pistës me mbështetjen dhe udhëzimet e Departamentit të Sigurisë së FIA-s.

Presidenti i FIA-s përgëzoi punën e qeverisë shqiptare në fushën e sigurisë rrugore, e cila ka ndikuar pozitivisht në shoqërinë shqiptare dhe ka dhënë një stimul për turizmin rajonal.

Presidenti i FIA-s, Mohammed Ben Sulayem tha: “Jam i kënaqur që shoh progresin që po bëhet në Shqipëri në aspektin e rritjes së motorsportit dhe nismat e shumta të sigurisë rrugore të nisura nga qeveria e Kryeministrit Edi Rama.

“Angazhime të tilla në Ballkan janë thelbësore për misionin e FIA-s për të dyfishuar pjesëmarrjen në motorsport në nivel global dhe për të sjellë më shumë ndërgjegjësim për rëndësinë e sigurisë rrugore. Projekti Auto Moto Park është një ilustrim i përsosur i bashkimit të motorsportit dhe lëvizshmërisë për të mirën e të gjithëve.”

Gjatë takimit, kryeministri Rama u zotua gjithashtu për mbështetjen e fushatës së FIA-s, “Të Bashkuar Kundër Abuzimit Online”, duke nënshkruar Kartën zyrtare të nismës.

Diskutimet u zhvilluan gjithashtu për mundësinë që Shqipëria të presë në të ardhmen një Konferencë të FIA-s ose Asamblenë e Përgjithshme Vjetore.

LEAVE A REPLY

Please enter your comment!
Please enter your name here